السبت، 24 أبريل 2010

قصة متحفين

لم انس ابدا اننى خريج الاثار الذى اكتويت بنار هذه الكلية والتى لم اعمل يوما بما درسته فيها وذهب ما تعلمته من هيروغليفى وهيراطيقى وقبطى مع رياح العمر بحثا عن وظيفة محترمة تفتح بيتا وتصرف على الاولاد من الحلال بدلا من الجلوس كمفتش اثرى ليس لك اى عمل سوى حراسة مخزن اثار لا تعلم محتواه ويعلم الذين سلموه لك ان ما استلمته مخالف تماما لما هو داخله
وكان لابد ان اختار ان اترك ما احببت ودرست او اكون شاهد ما شافش حاجة او حرامى اثار أبدا موظفا صغيرا وكلها كام سنه وابقى زى الفل
وعلشان انا فقرى ومبحبش الفل واهلى علمونى ان الحرام ما بينفعش والكلام اللى انا شايف عكسه تماما فى بلدنا وجدت نفسى ابتعد نهائيا عن العمل بالاثار رافعا الشعار الشهير نموت ..نموت وتحيا مصر ...الفرعونيه و صدقونى لو لم اكن مصريا لوددت ان اكون مصريا ...ايام خوفو او خفرع او حتى منكاورع ( الدلع منقرع ) الواحد ايامها كان عايش فى دولة بحق وحقيق مش على ما تفرج
المهم هذا الولع بالاثار والتحف صار لصيقا بى الى اليوم حتى اننى خفت ان تكون هذه هى لعنة الفراعنة ....ما ان انزل اى بلد حتى ابحث عن متحفها القومى لازوره وطبعا هلاقى حبايبى الفراعنه هناك ماهم متنطورين فى كل حته شويه فى المانيا على حبه فى انجلترا على مجموعة فى النمسا ....يا راجل ده انا لاقيت مسلة فى الفاتيكان ....ازاى وصلت هناك ...ده اللى انا مش عارفه !!!
الا ان اكبر مجموعه من الاثار الفرعونية وقعت عليها عينى كانت فى فرنسا فى متحف اللوفر - او متاحف اللوفر كما يطلق الفرنسيين عليه
ايه ده !! كمية اثار مصريه ......يا نهار ابيض ...انا مش عارف كل ده خرج ازاى ؟؟ المهم ان ربنا رحم الاثار اللى خرجت دى والله ....ليه ؟؟ اقولك
الاثار فى اللوفر يا جماعة محطوطة بطريقه تخللى الاثر ينطق ...اقول ايه عن الاضاءة ولا الشرح اللى على الاثر ولا الناس المحترمة اللى بتتفرج...... ايه ده ؟؟ تتمنى ربنا يسخطك طوبة لانك هناك محترم عن البنى ادم فى بلادنا ...اخذت اتجول بين الاثار واسترجعت تلك الذكريات المؤلمة التى عشتها بالمتحف المصرى والذى خضت فيه تجربة اريد ان ارويها لكم ......
كنا مجموعه من طلبة الاثار المجتهدين الذين لم نتلوث بعد بماديات ما بعد التخرج واقترحنا على الدكتور على رضوان /عميد الكلية انذاك ان نقوم بتكوين مجموعه من الطلبة الذين يكون عملهم هو شرح الاثار للاسر المصرية التى تتردد على المتحف بدون مقابل وذلك حتى نقوم بنشر الوعى الاثرى وقمنا بتسمية انفسنا بجماعة اصدقاء المتحف المصرى وبدانا فى الذهاب وتقديم خدماتنا للاسر يومى الخميس والجمعه ومع بداية تطبيق التجربة جائت قرعتى مع اسرة مصرية كان الاب فيها امين شرطة وعندما قدمت له نفسى قال لى هاتاخد فلوس ....قلت له ...لأ ابدا... فرد عليا وهو يبتسم يالله على البركة خللى العيال يفهمولهم حاجة بدل قاعدة الجنينه
بدات فى الشرح وسط تململ الاطفال وابوهم وامهم التى لم يفتح عليها الله الا بسؤالى إلا يا خويا التماثيل دى مش حرام ؟؟ ولم ارد ان ادخل فى مناقشة جدلية فرددت بزهق لا يا حاجة مش حرام ...هوه احنا بنعبدها ؟؟
...فردت بقرف الله يحرقهم راحوا فى ستين داهيه !!
ظللت اشرح الى ان وصلت بهم امام تمثال مصقول من الجرانيت لاحد الملوك فى وضع تعبدى واثناء الشرح اذا بالأب يقوم بملامسة وجه التمثال بكفه فنبهته ان هذا ممنوع وما ان بدانا بالتحرك من امام التمثال حتى قام الرجل بصفع التمثال على وجهه بقوة ....فسالته ايه اللى انت بتعمله ده ؟؟ فرد بغباء اصل وشه ناعم قوى وحبيت اصبح عليه ....هنا انتابتى حالة من الغيظ الشديد واخذت اصرخ فيه ...ليه كده ؟؟ انت بتعمل كده ليه ؟؟ اولادك هيتعلموا منك ايه ؟؟
عندها هب فى وجهى قائلا .....ايه يا عم هوه فيه ايه ؟؟ هوه من بقية اهلك .....بقولك باصبح عليه ...لا انا كهربته ولا نفخته ..... باصبح عليه !! ده لو كان عايش معانا كنت اديته بالجزمة !!
هنا انسحبت بسرعة من امامه وتركته وهو يحيى اصدقاءه من الامناء المنتشرين بالمتحف ويصبح على التماثيل .....

محمد شلتوت

هناك 7 تعليقات:

  1. و الله لو كان عايش حيدووسه على بطنة، مش حيستنا الجزمة..

    المشكلة تكمن في الثقافة، ثقافة الفرد، و هذا الرجل شو كان عسكريا، لكن مدللا، و يظن نفسه فوق الكل..

    و عن زوجته، إن كانت متردده في الذهاب إلى المتحف، إذا لماذا كانت هنالك و تتحدث عن هذه الآثار على أساس أنها حرام، و أنت مرشد أثري و لست عالما في الدين حتى تفتي ..!!

    عــــــــالم عجيب.. هذا هو الفرق بين العرب و الأجانب ..

    ردحذف
  2. نحن ولا حرج تحولنا الى شعب متعب

    اهلكته هموم الحياة اليومية المعقدة التى تحتاج الى وساطة لحل تفاصيلها العادية فكيف نريد ان يفكر فى اشياء اخرى

    عن اى حياة ثقافية او فنية تتحدث نحن همنا الحياة لا غير وماعدا هذا ترف لقد تحولنا الى امة من النمل

    تبحث عن قوتها وجحر تختبئ فيه وفى تشبيهى هذا ظلم كبير ايضا للنمل

    ردحذف
  3. الفرق في الثقافة واضح وشاسع بين شعبنا وبين الشعوب الآخرى وتحديدا الغربية وبعض الأسيوية
    وبما انه امين شرطه فهو عارف مهام مهنته كويس هو الصفع سواء بشر او تماثيل عامل على عاطل والمهام التانية معروفة اولها طبعا الفلوس علشان كدة سألك انت بتأخذ فلوس او لا لأنه لايدرك قيمة الآثار الي بيتفرج عليها..
    انا مرة كنت في غرفة الملك توت عنخ آمون وكان في المتحف المصري ولد بيسأل والده هما دول اجانب يابابا وفجأة تحول الأب الى داعية وواعظ دول كفار علشان مش مسلمين حيروحوا جهنم كفار كفار ونظرا لعلو صوته السياح تركوا مشاهدة الآثار ووقفوا يتفرجوا عليه اعتقد انه لفت انتباهم أكثر من طريقة عرض الآثار وللأسف مافيش أي حد من قوات الحراسة الموجودة اتحرك او قام بإخراجة من المكان ..
    وهذا هو حال الغالبية العظمى من شعبنا .

    تحياتي وتقديري

    ردحذف
  4. هههههههههه
    فكرتنى بعيلة صغيرة ساكنة جمبى وانا بابنى بيتى المونه فى الارض كل شوية البنت الصغيرة دى تيجى تضايق العمال وتنعكشلهم الرمل والمونه
    ولما قالولها عيب هددتهم انها تجيبلهم ابوها وانا بسئل على ابوها اللى المفعوصه الصغيره دى بتتمنظر بيه
    اتاريه امين شرطه

    عجبا مت هذه البلد
    http://www.facebook.com/profile.php?id=758538293

    ردحذف
  5. هههههههههههههههههههههههههههههههههههههههههههههه


    شكرا وحلوه منك يا ابو حميد


    شكرا شكرا شكرا



    شكرا

    زفات
    موقع زفات
    زفات راشد الماجد
    زفات حسين الجسمي
    اغاني زفات
    زفات محمد عبده
    زفات اسلاميه

    ردحذف
  6. أزال المؤلف هذا التعليق.

    ردحذف