الخميس، 25 فبراير 2010

الهند وما ادراك ما الهند ...2

ما حدش بيعرف قيمة امه الا ما يشوف مراة ابوه كانت هذه هى الحكمة المفضلة
لى اثناء زيارتى للهند والتى رايت فيها العجب ....
والتى ذكرتنى بصديق لوالدى زار الهند فى الستينات فاصبح مشهورا بين اصدقاء
والدى باسم الهندى فاصبحنا نقول بابا رايح للهندى بابا جاى من عند الهندى وكان
المهندس محمود الهندى هذا من القصاصين العظام الذى لا تمل من السماع له ولا تتردد
ابدا فى ان تعطى له اذنك لياكلها بالرغم مما كانت تحتويه قصصه........ من حتة هندى
الهند يا حضرات فيها كل حاجة اللى تتوقعه واللى مش ممكن ابدا تتوقعه ....
يعنى كل اللى نفسك فيه هتلاقيه هناك ....عايز ايه ؟؟ سحر وشعوذة ؟؟ موجود......
جنس وقلة ادب؟؟ تحت امرك .....كمبيوتر وتكنولجيا؟؟ ولاد عفريتة يجبلك الفيروس من دماغه
.....ادوية ومنشطات؟؟ ما فيش اكتر منها .....مسلمين ...مسيحيين .....يهود .....سيخ ......
ذراديشت .....بيعبدوا النملة هتلاقى المعبد وجواه النملة......... كله موجود يا مولانا
بدات قصتى هناك من ذاك المساء الاغبر الذى احسست فيه بالجوع فاتجهت خارجا
من الفندق ناويا ان اتمشى قليلا لعلى اجد اى دكانة فاتحة اجيب منها اى حاجة تتاكل
واخذت اسير على غير هدى حتى حدث ما سارويه لكم
كنت اسير على الرصيف المقابل لسور الفندق لامحا من قريب عجوزا هنديا يحاول ان يعبر الطريق الملئ بالعربات المسرعة حتى اذا ما عبر احد السيارات إلاوكانت الاخرى قد اطاحت به وكومته تحت قدمى ......نعم تحت قدمى وبين نظرات الرعب التى شاهدتها فى عينى الرجل وهو يحتضر ولحظات الرعب التى احسستها وتحت قدمى قتيل يتلوى من الالم لم اعرف كم من اللحظات مرت قبل ان تنفك عقدة لسانى واصرخ
حد يتصل بالبوليس –بالانجليزى طبعا مش بالهندى –
ولا حد هنا ......يا جدعان حد ينده الاسعاف.....الكل ماشى مطنش
جريت على الفندق القريب واخبرت حراسه بالواقعة فسالونى وما العمل؟؟ انا اللى هقولكم العمل ايه؟؟ اتصلوا بالبوليس ...الاسعاف؟؟
اى حد المهم نلحق الراجل ....طب انت متعصب ليه؟؟ سالنى احد الحراس.....رددت لان الراجل هيموت ....فرد وايه المشكلة؟؟ وفيها ايه لما يموت ؟؟ ساعتها نزل عليا سهم الله .....رجعت اجرى اشوف الراجل حصله ايه ؟؟ مالقيتوش !!
ايه ده .. لحق خف !! ومشى ازاى ؟؟ ده اخد خبطة تموت جمل !! خبطة من عربية بتجرى بالميت على مية وعشرين .....الراجل راح فين ؟؟؟ وبعدين لا فيه اثر لاسعاف ولا اثر لحادثة ولا حاجة ؟؟
ايه ده هوه ممكن الجوع يعمل كده فى البنى ادم ؟؟احسست بالخوف من نفسى وعلى نفسى فقررت الرجوع بسرعة للفندق .....ومش مهم اموت من الجوع بدل ما اموت من الرعب
فى الصباح اجتمع الاصدقاء وقررنا الذهاب الى (كولابا) وهى منطقة تشبه العتبة او الموسكى فى مصر وللذهاب اليها اتفقنا مع احد اهم المواصلات فى الهند على الذهاب هناك .....اننى اتكلم عن التوكتوك
التوكتوك هو الحل الهندى للزحام وللاجرة ايضا فاذا كنت ميسور الحال فى الهند فعليك بالتاكسى المكيف والتكييف مهم جدا فى الهند حيث الرطوبة لا تطاق اما لوكنت نص نص فعليك بالتاكسى الغير مكيف اما لو كنت على باب الله فلتتخذ من التوكتوك صديقا ....لا اعرف من العبقرى من الزملاء الذى اقترح علينا بان نستقل التوكتوك
واهى منها روشنه ومنها توفير .....ركبنا التوكتوك وتوكلنا على الله
وفى منتصف المسافة حدث ما لم نكن نتوقعه ؟؟؟
اثناء سير التوكتوك لاحظت ان السواق من النوع الروش وبياخد غرز بالتوكتوك وحسسنى انه راكب جاجوار فقلت معلهش شاب وعايش سنه
كما لاحظت ان سرعته عاليه فحاولت ان انبهه الا انه نفضلى أو بالاصح حلقلى فقلت معلهش الراجل ده هندى وعارف سلو بلدهم وده ييجى ايه فى سواقين الميكروباص عندنا ؟؟ ده لسه بيتعلم ....
المهم انه فى منتصف الرحلة تقريبا خبط الاستاذ فى ذيل بقرة ....ايوه
مش البقرة نفسها ..لأ ...ديلها وكانت الواقعة ....لقيت الناس اتلمت حوالينا من كل ناحية واللى يلزق السواق على قفاه واللى يضربه فى بطنه واللى يزقه يوقعه – بالمناسبه دى كانت البلد الوحيد اللى شفت فيها ضرب على القفا خارج المحروسه
المهم ان الراجل مستسلم خالص خرجنا من التوكتوك وايه ياعم ؟ فيه ايه ؟؟ تبرع احدهم وقال بانجليزية تبقى تقابلنى لو فهمت منها حاجة
ازاى الواد ده يخبط البقرة فى ديلها ؟؟ هوه مش عارف يعنى ايه بقرة ؟
دى خيرها عليه وعلى اهله ؟؟
تذكرت ساعتها ما حدث للراجل المسكين بالامس وقلت فى عقل بالى لو خمس الناس الواقفة دى كانت وقفت امبارح ما كنش الراجل زمانه مرمى فى اى مشرحة او خرابة....المهم من هنا لهنا ومعلهش وعلشان خاطرنا
ومصر والهند وناصر ونهرو وتاتا والفيل .... المهم سابونا بعد ما خدوا من الراجل كل الفلوس اللى معاه وطبعا بعد ما وصلنا قعد يعيط وكان لازم علينا على الاقل نعوضه باى حاجة وساعتها وياللعجب رايته يسمعنى باهتمام لاول مرة وانا انصحه نصيحة اخوية ولوجه الله طول ماهوه عايش فى الهند يبعد عن البهايم ......ومش مهم لو داس بنى ادمين

محمد شلتوت

هناك تعليق واحد: