الثلاثاء، 24 أغسطس، 2010

المرور

قبل ان ابدئ تجوالى فى بلاد الله كنت اظن _وبعض الظن اثم _ انه فى اوروبا والدول المتقدمة يمتلكون طرقا اوسع وميادين ارحب وان الناس هناك لا يعانون ابدا من مشاكل المرور التى نعانيها ......
لكن للاسف اتضح لى العكس تماما ......انهم يمتلكون طرقا _فى احوال كثيرة _ اضيق من طرقنا وميادينهم معظمها ليست باتساع ميدان الكونكورد الشهير ...كما انهم فى احيان كثيرة يعانون من مشاكل مرورية كبيرة .....اذن اين المشكلة ؟؟؟ المشكلة للاسف ......فينا
نعم مشكلتنا فى انفسنا فنحن لا نحترم اشارة (هذا اذا كان فيه اشارة اساسا ) ولا نطبق قانونا (هذا اذا كان هناك قانون يطبق فى الاصل ) ولا نتبع نظاما ...(يعنى ايه نظام !!!! )
رايت فى بلاد الفرنجة مرورا بلا ضباط ورايت فى بلادى ضباطا بلا مرور
كانت تجربتى الاولى فى باريس والتى كنت اعتقد قبل زيارتها ان شوارعها بحجم طريق النصر _ الذى كان يقام فيه العرض العسكرى بالقاهرة – وهو بالمناسبة اعرض طريق فى مصر المحروسة
ولكننى وجدتهم اغلب من الغلب..... طرقهم ضيقة واغلبها اتجاه واحد والمفاجأة انهم من كتر غلبهم بيخلوا العربيات ذات الارقام المجوز تمشى يوم والارقام الفردى تمشى يوم تانى يعنى بيبدلوا ....
والمرور ماشى حلو و ميه ميه .......ليه !! لان كل واحد هناك محترم نفسه ما بيبلطجش على خلق الله ولا بيرمى شمال ولا بيحدف يمين عايز يعدى بالعافية ولا فيه واحد شحط جايب كرسى وقاعد فى وسط الشارع بيشد شيشه ولا ميكروباص بينزل الناس فى وسط الطريق وياكش تولع .....حتى البلاد اللى مليانه توك توك ياربى زى بانكوك والهند المرور ماشى فيها حلاوة اما هنا .......لنا الله!!!!
الرصيف فى اوروبا مقدس لا احد يجروء على المساس به حتى فى المناطق السياحيه مثل برشلونه واثينا تستطيع بعض الكافيهات اخذ جزء من الرصيف ولكن بحساب وليس على حساب الناس ....هناك .....من يمشى فى وسط الشارع فهو مجنون ....وفى بلادى من يمشى على الرصيف فهو فاضى بيضيع وقت .....واتحداك ان تمشى على الرصيف فى مصر لاكثر من خطوات قليلة دون ان تنزل الى نهر الطريق وترد مرة اخرى ( استبعد الكورنيش ومارينا ).....
أما عن اول حادثه رايتها فى اوربا فقد كانت فى باريس عندما اصطدمت عربة نقل كبيرة باتوبيس الطاقم المتجه ناحية المطار..... كان حادث اصطدام بسيط يومها استعددت لسماع الشتائم الفرنسية وقلت ننزل نعمل واجب مع الراجل يمكن سواق النقل يلطشه قلم او يهفه قفا .....لكن للاسف ذهب كل ما تخيلته هباء ....نزل الرجلان بهدؤ ونظر كل منهم الى سيارته واحاط بما فيها من تلفيات وتبادلا اوراقا لم اعرف ما هى ثم افترقا دون كلمة واحدة ولا ظابط بوليس ولا امين شرطة ولا مين ابن ال..... اللى اداك الرخصة ؟؟؟
لقد تبادلا ارقام وثائق التامين على العربتين ولا اعرف ما هى الاجراءات المتبعه بعد ذلك ولكننى رايت منظرا حضاريا لكم اتمنى ان اراه فى شوارعنا

هذا المنظر ذكرنى بحادث ما زال مطبوعا فى ذاكرتى رايته وانا اقود سيارتى فوق كوبرى اكتوبر .....كانت ساعة الظهيرة والكوبرى كالعادة بطيئا مملا وكانت السيارات تسير عليه كما تسير جماعات السلاحف نحو البحر بعد عملية الفقس _ لاننا بالفعل كنا قد فقسنا من الحر _ وفجاة اصطدمت سيارة بيتلز قديمة بمؤخرة سيارة تاكسى فحطمت له فوانيس المؤخرة تماما _ وما ادراك ما
البيتلز .....!!!
فما كان من سواق التاكسى الا ان نزل من السيارة وذهب للخلف وراى ما حدث بسيارته فرجع بكل هدوء الى داخل السيارة وخرج منها وهو يحمل عتلة .......واتجه ناحية البيتلز وقام بخبط فانوسها الايسر وهو يقول بصوت عالى .......آدى واحد......ثم اتجه ناحية الفانوس الايمن وهو يقول ...وآدى التانى !!!
ثم اشار لصاحب السيارة باصبعه اشارة قبيحة وهو يقول له ......كده خالصين يا باشا !!!!
هكذا وبكل هدوء ......الغريب فى الامر ان صاحب البيتلز تقبل الامر بصدر رحب واستنارة عالية - يمكن علشان الموضوع خاص بالفوانيس- واكمل سيره مع قطيع السيارات فوق الكوبرى وكأن شيئا لم يكن ....
بس يا سيدى ومن يومها وانا حاطط تحت الكرسى عتله حديد عندما رآها احد اصدقائى مؤخرا ضحك بشدة وقال : ده انت قديم قوى ....يابنى كل الناس ماشيه دلوقت ب self defense

محمد شلتوت

هناك 6 تعليقات:

  1. المشكلة يا مضيفنا ، أن اغلب العرب ليست لديهم ثقافة في قيادة السيارة، نحن الحمد الله الشوارع فيها نظام و كل من يخالف يكسر ظهره بالغرامة أو حجو السيارة و لا يستطيع أي شخص أن يتعدى الإشارة الحمراء لكن ما يزعجني أننا نفتقر لهذا الثقافة يعني ما أقصده أنت الآن تسووق يأتي شخص من الجهة الثانية أمامك دون أن ينبك بإشارة أو يكون في الدوار دون أن يعطيك إشارة هذه الأمرو عند أغلب الناس تافهة لكنها هي السبب الرئيسي في الحوادث ..

    و إن شاء الله الدور العربية تنافس الأوروبية يا رب و نشووف هاليوم ..

    أما في أوروبا في إحترام و ثقافة

    ردحذف
  2. 99فى المية من المصريين مش بيعرفوا يسوقوا فاهمين انهم لما يمشوا بسرعة يبقى كده تمام
    بس الفكرة ان لازم يكون فى ذوق وده للاسف مش موجود تقريبا

    ردحذف
  3. self defense !!!!
    ينهار اسود أحنا في غابة ولا ايه
    بالمناسبة يا شلتوت انا لوحبيت اجيب واحد للعربية بتاعتي أجيبه منين ؟
    طيب بص انا عندي خنجر كنت جيبته من اليمن ممكن يوفي بالغرض
    بس ربنا يستر و متصدمش عربيتي من عربية واحد معاه مسدس
    محمد توفيق (-:)

    ردحذف
  4. اسمحلى انا ليه رأى فى موضع ان الناس نفسها هى المشكلة... القوانين كتييييييييير والنظام كلنا عارفينه كويس بدليل اننا بنطبقة فى اى مكان فيه نظام جوا او بره مصر احنا مشكلتنا ان الناس الكبيرة القدوة يعنى... حرام يتطبق عليهم النظام والقانون و طبعا الكبار دول مفيش مانع يخدو فى سكتهم حبايبهم و معارفهم و دووول كتيييييير نيجى فى الاخر ...القانون دا يطربأ على دماغ الغلبان المسكين والدليل على كده انك لو رحت اى مكان منظم اول حاجة بتقولها النظام هناك مالوش حل بيطبق على المدير قبل الغفير الناس هناك مبيعرفوش ابوهم ... فاقد الشئ لا يعطيه ... عارف زى ايه زى اخينا اللى بيطلع دا يقولك اربط الحزام اربط الحزام الناس بتزيد و بتكتر وهو اساسا ميعرفش يعنى ايه حزام و لا عمره شافه عارف ليه لانه لابس جلبايه خليجى 100 اكس لارج ... مش كده ولا ايه

    ردحذف